बुधबार, अशोज ७, २०७७ | Wednesday 23rd September 2020
जोडिनुहोस
  • गृहपृष्‍ठ
  • स्याङ्जा सेरोफेरो
  • बजारवासीलाई सचेत गराउँदै गल्याङबजारमा नगरपालिकाको अनुगमन
स्याङ्जा सेरोफेरो

बजारवासीलाई सचेत गराउँदै गल्याङबजारमा नगरपालिकाको अनुगमन

  • स्याङ्जा सेरोफेरो बुधबार, साउन २१, २०७७ | August 5, 2020

२१ साउन, गल्याङ :

स्याङ्जाको गल्याङ नगरपालिकामा कोरोना संक्रमणको जोखिमबारे स्थानीयवासीलाई सचेत गराउँदै बजार अनुगमन गरिएको छ । नगरपालिकाको मुख्य बजार रहेको गल्याङबजारमा गल्याङ नगरपालिकाले सचेत गराउँदै बजार अनुगमन गरेको हो ।

नगरपालिकाले तोकेको मापदण्ड अनुसार मात्र बजार सञ्चालन गर्न, सामाजिक दुरी कायम राख्न र मास्कको अनिवार्य प्रयोग गर्नका लागि सचेत गराइएको छ ।

गल्याङ नगरपालिकाका प्रमुख प्रशासकीय अधिकृत ईश्वरीप्रसाद पाण्डेको नेतृत्वमा भएको अनुगमनमा प्रहरी, गल्याङ उद्योग वाणिज्य संघ तथा गल्याङ चेम्बर अफ कमर्सका पदाधीकारी तथा पत्रकारहरुको सहभागिता रहेको थियो ।

अनुगमनका क्रममा तोकिएको समयमा मात्र अत्यावश्यक पसल तथा व्यवसाय मात्रै सञ्चालन गर्न, कपडा तथा भाँडा पसलहरु सञ्चालन नगर्न अनुरोध गरिएको थियो ।

दुध, तरकारी र फलफुल पसल विहान सात बजे देखि नौ बजेसम्म मात्रै, खाद्यान्न पसलहरु मध्यान्ह १२ बजे देखि ३ बजेसम्म मात्रै सञ्चालन गर्न अनुरोध गरिएको हो ।

यस्तै, अन्य पसल व्यवसाय सञ्चालन नगरी कोरोना भाइरस विरुद्वको लडाईमा सहकार्य गर्न नगरपालिकाले अनुरोध गरेको छ ।

यसैवीच, अनुगमनका क्रममा मास्क नलगाई हिड्नेहरुलाई कारवाही स्वरुप मास्क वितरण गरिएको छ । पहिलो चरणमा कारवाही स्वरुप मास्क वितरण मात्रै गरिएको हो ।

अनुगमन सकिएपछि प्रमुख प्रशासकीय अधिकृत इश्वरीप्रसाद पाण्डेले कारवाही स्वरुप मास्क वितरण गरिएको र पसलहरुलाई पनि सचेत मात्रै गराइएको बताउनुभयो ।

स्थानीय वासीहरुको सुरक्षाको लागि आफुहरु नै सचेत हुनुपर्ने भन्दै उहाँले अरुले भनेर भन्दा पनि आफ्नो सुरक्षा आफै गर्नुपर्ने बताउनुभयो ।

यस्तै, बैंकहरुलाई पनि अत्यावश्यक काम बाहेकका अन्य कामहरु नगर्न अनुरोध गरिएको छ । सहकारीहरु पूर्ण रुपमा बन्द गर्न र अत्यावश्यक काम बाहेक बैंक पनि बन्द गर्न आग्रह गरिएको पाण्डेले बताउनुभयो ।

फेसबुक प्रतिक्रियाहरु